Hum Jakh Chaa Takh – हम जक्ख छां तक्ख

Hum Jakh Chaa Takh – हम जक्ख छां तक्ख

हम जक्ख छां तक्ख
डांडा गौं मुल्क चा,
हम जक्ख छां तक्ख
एक सैंत्यूं बंण चा।।

हम जक्ख छां तक्ख
डांड्यूं मा परोस्यूं ह्यूं चा,
हम जक्ख छां तक्ख
तेलुड़ू अर् स्वीलू घाम चा।।

हम जक्ख छां तक्ख
हिवांलों मा शिवालय चा,
हम जक्ख छां तक्ख
धार धारू मा देवी को वास चा।।

हम जक्ख छां तक्ख
थौला म्यौलू बार चा,
हम जक्ख छां तक्ख,
धियांण बेदुंणें रीत चा।।

हम जक्ख छां तक्ख
बुग्यालू कि सैर चा,
हम जक्ख छां तक्ख,
गैरा- गैरा पांणी का ताल चा।।

हम जक्ख छां तक्ख
बार त्यवारू बसंत चा,
हम जक्ख छां तक्ख
पैंणु बाटणौं सुभौ चा।।

हम जक्ख छां तक्ख
मिलु जुलि धांण कनौ सग्वोर चा,
हम जक्ख छां तक्ख,
मनख्यों मा मनख्यात चा,

हम जक्ख छां तक्ख
लड़ै झगड़ा भी चा,
हम जक्ख छां तक्ख,
लाड प्यार भी खूब खत्यैंदू चा।।

हम जक्ख छां तक्ख
ढोल दमों कु बाजू चा
हम जक्ख छां तक्ख
मुल्क बड़ो महान चा

हम जक्ख चा तक्ख
बरखुदु चौमास चा
हम जक्ख छां तक्ख
मरूड़ीयों घाम चा

हम जक्ख छां तक्ख
बारामासी धाण चा
हम जक्ख छां तक्ख
ग्वेर घसेनयों कु गुमणाट चा

हम जक्ख छां तक्ख
थड़िया चौफला झुमैलो चा
हम जक्ख छां तक्ख
पैरवार रंगीलो चा

लेख : – हरदेव नेगी &  नीलम रावत

 

Leave a Reply

Your email address will not be published. Required fields are marked *