अन्वार

Anwaar Garhwali Poem,

स्वांणी मुखड़ी फ्योलीं जन चार।
कजर्याली आंखी जन ब्वे की चार।
जिदेर जिकुड़ी अर् बालू मन।
सच्ची ब्वोला! कैंकि ह्वेली ईं पर अन्वार।

            छाली बाच अर् रुओंन्दी बार- बार।
           गल्वाणि जन् बाबा जी कि चार।
           धांण काज मा भि भलु सज धज।    
          सच्चि ब्वोला! कैंकि ह्वेली ईं पर अन्वार।

हाथि खुटि अर् बिगरैल श्रृंगार।
गैंणा पातों सौक जन फूफू चार।
लता कपड़ो कि खूब चा सोक्यांण।
सच्चि ब्वोला! कैंकि ह्वेली ईं पर अन्वार।

          रुसांणु मनाणु जन भै बैंण्यो कु प्यार।
          खुद बिसरोन्दी जन मैत्यों कि चार।
          म्योला थौलों कु मिठु रंग रूप
          सच्चि ब्वोला! कैंकि ह्वेलि ईं पर अन्वार।

लाडी लड्या स्या सबु की दुलार।
छुंयु की रसिली जन दीदी चार।
पिथ्योंणा सी जन भारि गुसेण।
सच्चि ब्वोला! कैंकी ह्वेलि ईं पर अन्वार।

             ज्ञान की गंगा सी।
                मैलुख चा जन दादा की चार।
                औंन्दु उमाल जिकुड़ा भरिक्।
              सच्चि ब्वोला! कैंकी ह्वेली ईं पर अन्वार

लेख – हरदेव नेगी 

Leave a Reply

Your email address will not be published. Required fields are marked *